Una visita a Besiers

Pendant la setmana de "vacanças" prenguèri lo tren de Montpelhièr a Besièrs. Dempuèi pro longtemps voliái visitar aquela vila. Aviái legit l'istòria tan sorna de son quasi anientament a la debuta de la crosada contra los albigeses, en junh de 1209, que m'aviá fòrça tocat. Per ieu, visitar la vila èra una escasença un pauc solemna.

Partiguèri lo diluns. M'agradava plan d'anar endacòm defòra de Montpelhièr! Defòra de mon estùdio! Viatgi amb plaser en tren. I a un an, en estiu, ai pres lo tren de Seattle a Milwaukee, dins Wisconsin. Aquel viatge durava quaranta quatre oras. Quitament per ieu èra un pauc longuet. De Montpelhièr a Besièrs dura normalament quaranta quatre minutas, s'i a pas d'alongui. Aquò va plan.

A Besièrs visitèri un jardin polit ont i a d'estatuas de poètas e d'autres escrivans. Me setèri per manjar un entrepan e soscar sus lo sens de la vida. Ai pas trobat, mas lo jardin èra fòrça polit e las fuèlhas d'arbres tombavan sens besonh de saber lo sens de tombar. 

La vesprada visitèri lo CIRDOC, qu'èra plan interessant. Ara soi sòci! Al CIRDOC i a un fum de ressorças per cercar e aprene la lenga occitana. A la fin de la vesprada anèri al pichon apartament qu'aviái logat per la nuèch, per Airbnb. L'apartament es dins la Rue Berlioz; ai pensat que seriá polit coma la musica polida de Berlioz, mas èra pas. Tant pis! Costava pas los uèlhs del cap.

Lo lendeman visitèri l'I.E.O., que per bonastre èra dobèrt lo dimars. Faguèri la coneissença de Domenge Caucat, un òme plan simpatic, un dels menaires d'I.E.O. a Besièrs. Crompèri una mapa d'Occitània que voliái, coma avèm dins la sala de classa 106 a la fac. Trobèri d'unes libres tanben, e de mai.

Finalament, passagèri aicí e ailà per las carrièras de Besièrs. Vegèri de roïnas romanicas, una glèisa anciana puslèu sinistra, e la catedrala Sant Nasari, fòrça impressionanta. Poguèri pas dintrar, èra barrada, mas poguèri agachar de defòra, e encara soscar sul sens de la vida e sus las gents, lo fum de gents, que trobavan la mòrt aicí, abans que la glèisa "novela" foguèsse bastida. Es una istòria plena de tristesa e d'injustícia.

Plen de pensadas prigondas, tornèri prene lo tren a Montpelhièr, mas aqueste còp, per cambiar, prenguèri lo TGV. Lo viatge durava trenta nòu minutas, sens retard.

Foto d'estatua de Jeanne d'Arc al costat de la catedrala.  Video de Besiers a l'ora de puench.

Besiers vila