Pierre François pintre
En agachant las òbras del pintre Pierre François, m'agradan fòrça sas causidas de colors tant fòrtas e saturadas. Senti plan d'energia, de vigor e de jòia dins sas pinturas. Mas una òbra me pertòca especialament, e autrament: Pierre François el meteis ditz, dins un film realisat per sa filha Isabelle François, que sap pas quand la faguèt ni dins quin estat d'esperit èra quand la pintrèt. Sus l'imatge vesèm en dejós una vila fòrça colorada amb de teulats e de parets de fòrmas variablas mai o mens geometricas: un molon de vida sus una còla. Puèi en naut, per dessús, i a un cèl grèu e gris, gaireben negre, sens fòrma, un non-res; a travèrs aquel camp mòrt vòlan d'avions de guèrra que tomban de bombas immensas directament sus la vila.
La composicion d'aquela pintura m'agrada, mas me fa paur. Lo contrast es plan agut entre la vida -- tota aquela creativitat e jòia dins la vila -- d'un costat, e de l'autre, una fòrça murtrièra que cèrca tot desboselar. Per ieu, mòstra una realitat del monde d'uèi: pertot, la vida vidanta del mond es menaçada per la guèrra o autras fòrmas de violéncia. E non solament d'uèi! Per malastre, la violéncia demòra dins lo còr d'òmes dempuèi totjorn. Las bombas d'uèi son los trabucs d'un còp èra; la vila de Besièrs tanben èra plena de vida e de beutat abans lo masèl de 1209. Tanben Dresden, Guernica, Nagasaki...
Jef Aérosol – Crédits photos : Time Out Paris
© Pierre François
Commentaires
Enregistrer un commentaire